Author: Global Awaj

काठमाडौँ । पूर्वाधार निर्माणलाई थप गति दिन आगामी जेठ ४ गतेसम्म त्रिभुवन अन्तरराष्ट्रिय विमानस्थल दैनिक सात घण्टा बन्द हुने भएको छ ।

विमानस्थलको टर्मिनल व्यवस्थापन महाशाखा प्रमुख इन्दुराज अधिकारीका अनुसार ‘पेभमेन्ट कन्स्ट्रक्सन वर्क’ कार्यका लागि राति ११:४५ देखि बिहान ६:३० बजेसम्म विमानस्थलको उडान तथा अवतरण बन्द हुनेछ ।

विमानस्थलको धावनमार्गको छेउमा रहेको ट्याक्सीवेमा निर्माण जारी छ । सुरक्षाका दृष्टिकोणले रातको समयमा विमानस्थल पूर्ण रूपमा बन्द गरिन लागिएको हो ।

निर्माणलाई गति दिन विमानस्थल बन्द गरिने विमानस्थल कार्यालयद्वारा जारी सूचनामा उल्लेख छ । सूचनाअनुसार विमानस्थल बन्द हुँदा त्यसबाट पर्न जाने असरलाई न्यूनीकरण गर्न आवश्यकताअनुसार उडान तथा अवतरणको कार्यतालिका निर्धारण गर्न हवाई सेवा प्रदायकलाई विमानस्थल कार्यालयले आग्रह गरेको छ ।

काठमाडौँ । वैदेशिक रोजगार विभागले पश्चिम एसियाका विभिन्न देशहरूका लागि रोकिएको श्रम स्वीकृति सेवा पुन: सञ्चालनमा ल्याएको छ। विभागले सूचना जारी गर्दै यसअघि अस्थायी रूपमा स्थगन गरिएको प्रक्रिया अब पुन: सुरु गरिएको जनाएको हो।

विभागका अनुसार क्षेत्रीय परिस्थितिका कारण साउदी अरेबिया, संयुक्त अरब इमिरेट्स (यूएई), कतार, कुवेत, बहराइन, ओमान, इराक, यमन, जोर्डन, लेबनान, टर्की र इजरायललगायत मुलुकहरूमा श्रम स्वीकृति सेवा केही समयका लागि रोकिएको थियो।

श्रम, रोजगार तथा सामाजिक सुरक्षा मन्त्रालयको हालैको मन्त्रीस्तरीय निर्णयअनुसार इराक बाहेकका सबै उल्लेखित देशहरूमा व्यक्तिगत, संस्थागत तथा वैधानिकीकरणसम्बन्धी सबै प्रकारका श्रम स्वीकृति प्रक्रिया पूर्ववत रूपमा सञ्चालनमा ल्याइएको विभागले स्पष्ट पारेको छ।

इराकका हकमा भने मन्त्रिपरिषद्को अघिल्लो निर्णयअनुसार नै श्रम स्वीकृति प्रक्रिया अघि बढाइने व्यवस्था कायम रहने बताइएको छ।

विभागले यो निर्णयबारे सम्बन्धित सबै सरोकारवाला निकाय तथा सेवाग्राहीलाई औपचारिक रूपमा जानकारी गराइसकेको जनाएको छ।