Month: ३ महिना अगाडि

काठमाडौँ

फागुन १५ गते,

नेपाली कम्युनिस्ट पार्टीका संयोजक पुष्पकमल दाहाल ‘प्रचण्ड’ले रोल्पाबाट चुनावअघिको अन्तिम सार्वजनिक सम्बोधन गर्ने भएका छन् । रोल्पा सदरमुकाम लिबाङको टुँडिखेलमा शनिवार आयोजित कार्यक्रममा उनले फागुन २१ गते हुने प्रतिनिधि सभा निर्वाचनका लागि सार्वजनिक अपिल गर्नेछन् ।

प्रचण्डको सचिवालयका अनुसार, चुनावअघि देशभर कुनै ठूला कार्यक्रम नरहेको र रोल्पाबाटै निर्णायक सन्देशसहित सम्बोधन गर्ने योजना रहेको छ । यो उनको चुनावी अभियानको महत्त्वपूर्ण कार्यक्रम हो ।

कार्यक्रमलाई भव्य बनाउन नेकपाले व्यापक तयारी गरेको छ । करिब १५ हजार मानिसले प्रत्यक्ष रूपमा कार्यक्रममा सहभागी हुने अपेक्षा गरिएको छ । १० वर्षे जनयुद्धका क्रममा प्रचण्डले रोल्पामा नै बढी समय बिताएका थिए । यस पटक उनी रुकुम पूर्वबाट प्रतिनिधिसभा सदस्य पदमा उम्मेदवार छन् भने उनको विश्वासपात्र वर्षमान पुन ‘अनन्त’ रोल्पाबाट उम्मेदवार छन् ।

लिबाङको चुनावी सभालाई संयोजक प्रचण्डसँगै वर्षमान पुन, पूर्व सभामुख कृष्णबहादुर महरा, पूर्व सभामुख ओनसरी घर्तीमगरलगायत नेताहरूले सम्बोधन गर्ने कार्यक्रम रहेको छ ।

काठमाडौँ 

फागुन १५ गते,

नेपाली काँग्रेसका सभापति गगन थापाले सिस्टम नबनाएसम्म देश नबन्ने बताएका छन्। बुटवलमा आयोजित चुनावी सभालाई सम्बोधन गर्दै सिस्टम बनाएर निमसंगत ढंगबाट गतिका साथ काम गर्नको लागि आफूले ७ वर्षदेखि काम गर्दै आइरहेको बताए।

उनले भने, ‘हामीले दिनरात ७ वर्ष काम गरेका छौँ। प्रोजेक्ट गभर्मेन्ट हामीले दिनरात काम गरेर किसानलाई समयमा मल पुर्‍याउनेदेखि पहाडको बाँदर कसरी खेद्ने भन्नेको सम्मको काम टीम बनाएर गरिरहेका छौँ। बल्ला काम गर्ने ठाउँमा जाने मौका पाएका छौँ।’

काठमाडौँ

फागुन १५ गते,

नेकपा एमालेका महासचिव शंकर पोखरेलले चुनावको मुखमा सार्वजनिक गरिएको बीबीसीको डकुमेन्ट्री सञ्चार सामग्री मात्र नभई भूराजनीतिक चलखेलको संकेत भएको बताएका छन् ।  पोखरेलले सामाजिक सञ्जाल फेसबुकमा लेखेका छन्, ‘चुनावको मुखमा सार्वजनिक गरिएको बीबीसीको डकुमेन्ट्री केवल सञ्चार सामग्री मात्र होइन – यो भूराजनीतिक चलखेलको जिउँदो प्रमाण हो ।’

उनले नेपालजस्तो सार्वभौम राष्ट्रको आन्तरिक राजनीतिक प्रक्रियामा बाह्य प्रभाव पार्ने प्रयास अस्वीकार्य हुने बताए। चुनावको संवेदनशील समयमा यस्तो सामग्री सार्वजनिक हुनु संयोग मात्र हो कि नियोजित हस्तक्षेप हो भन्ने प्रश्न उठाउनुपर्ने उनको भनाइ छ । उनले भने, ‘नेपालजस्तो सार्वभौम राष्ट्रको आन्तरिक राजनीतिक प्रक्रियामा बाह्य प्रभाव पार्ने कुनै पनि प्रयास अस्वीकार्य छ । चुनावको संवेदनशील समयमा यस्ता सामग्री सार्वजनिक हुनु संयोग मात्र हो कि नियोजित हस्तक्षेप हो ।’

पोखरेलले लोकतन्त्रको रक्षा नेपाली जनताले आफैँ गर्नुपर्ने, राष्ट्रिय सार्वभौमिकता साझा जिम्मेवारी भएको र सूचना स्वतन्त्र भए पनि समय, सन्दर्भ र उद्देश्य पारदर्शी हुनुपर्ने धारणा व्यक्त गरे ।उनले भूराजनीतिक दबाब र प्रोपागान्डाको खेलमा नेपाल प्रयोग हुन नदिन सबैलाई सचेत रहन, तथ्य जाँच गर्न र राष्ट्रिय हितको पक्षमा उभिन आग्रह गरेका छन् ।

पोखरेलले लोकतन्त्रको रक्षा नेपाली जनताले आफैँले गर्नुपर्ने भन्दै नेपालको सार्वभौमिकता हाम्रो साझा जिम्मेवारी रहेको बताएका छन् ।

काठमाडौँ 

फागुन १५ गते,

नेकपा एमालेका अध्यक्ष केपी शर्मा ओलीले सरकारले अझै पनि निष्पक्ष निर्वाचनको वातावरण बनाउन नसकेको बताएका छन्। मुलुकको सार्वभौम संसदलाई ध्वङ्सको माध्यमबाट बलजफ्ति विघटन गरिएपछि देश संकटतर्फ धकेलिएको उनको भनाइ छ। शुक्रबार झापाको दमकमा अनेरास्ववियूले आयोजना गरेको ‘बासँग विद्यार्थी’ कार्यक्रममा उनले देशमा आई परेको संकटबाट मुक्ति दिलाउन एमाले चुनावमा गएको समेत बताए।  

एमाले चुनावबाट न भाग्ने भएकाले देशैभरि पार्टी चुनावमा केन्द्रित भएको उल्लेख गर्दै ओलीले आगामी चुनावबाट एमाले नै पहिलो शक्ति बन्ने र देशमा आई परेका समस्याहरूको समाधान निकाल्ने बताए। पूर्वप्रधानमन्त्री समेत रहेका ओलीले चुनावमा हुने कुनै पनि प्रकारका धाँधली एमालेलाई मान्य नहुने समेत बताए। चुनावलाई निष्पक्ष, धाँधलीरहित बनाउन सरकार गम्भीर नदेखिएको समेत उनको भनाइ छ। कार्यक्रममा उनले युवाहरूलाई विभिन्न माध्यमबाट छरिने भ्रममा नपर्न र त्यस्ता भ्रमहरू चिर्ने काममा लाग्न आग्रह गरे।

कार्यक्रममा युवा विद्यार्थीहरुले अध्यक्ष ओलीसमक्ष विभिन्न जिज्ञासा राखेका थिए। उनीहरूको जिज्ञासा सम्बोधन गर्दै उनले कुनै पनि पार्टीले कस्तो भुमिका निर्वाह गर्छ र के गर्छ भन्ने कुरा उसको सिद्धान्त, कार्यक्रम र एजेण्डाले निर्धारण गर्ने भन्दै एमालेका कार्यक्रम र सिद्धान्तहरू जनतासम्म पुर्याउन सुझाव पनि दिए।

काठमाडौँ 

फागुन १५ गते,

यही फागुन २१ मा हुने प्रतिनिधि सभा सदस्य निर्वाचनका लागि देशभरका १६५ निर्वाचन क्षेत्रमा दुई लाख २१ हजार कर्मचारी खटिने भएका छन् । ७७ जिल्लाका १६५ निर्वाचन क्षेत्रका २३ हजार ११२ केन्द्र र समानुपातिकमा मात्र मत हाल्ने १४३ अस्थायी केन्द्रमा गरी उक्त सङ्ख्यामा कर्मचारी खटाउने भएको हो ।

निर्वाचन आयोगका सहायक प्रवक्ता प्रकाश न्यौपानेले पाँच सयभन्दा बढी मतदाता भएका केन्द्रमा नौ जना र ५०० भन्दा कम मतदाता भएका केन्द्रमा आठ जना कर्मचारी खटाउने व्यवस्था मिलाइएको बताए। मतदान केन्द्रमा खटिने मतदान अधिकृत र सहायक मतदान अधिकृतलाई प्रशिक्षण दिएपछि केन्द्रमा खटिने अरू कर्मचारीलाई मतदान अधिकृतले नै प्रशिक्षण दिने व्यवस्था मिलाइएको पनि आयोगले जनाएको छ ।

निर्वाचनका लागि निर्वाचन सामग्री र मतपत्र बिहीबार देशभरका १६५ वटै निर्वाचन क्षेत्रमा पुगिसकेको आयोगले जनाएको छ ।