काठमाडौँ
फागुन १३ गते,
नेपाली कम्युनिष्ट पार्टी (नेकपा) का नेता वर्षमान पुन ‘अनन्त’ रोल्पालीले शिर झुकाउनुपर्ने काम नगर्ने बताएका छन् । आगामी २१ फागुनमा हुने प्रतिनिधि सभा निर्वाचनका लागि सामाजिक सञ्जाल मार्फत भिडियो जारी गरेर मत माग्दै उनले यस्तो बताएका हुन् । रोल्पाली जनताको शिर झुक्ने तथा मतको दुरुपयोग गर्ने कुनै काम नगरेको र अब पनि नगर्ने उनले बताए ।
पुनले जनप्रतिनिधिका रूपमा आफूले जिल्लाको पूर्वाधार विकासमा गरेको कामबारे चर्चा गर्दै उनले जिल्लाका ७२ वटै वडामा सडक सञ्जाल विस्तार, जिल्लाभरका विद्यालयमा आधुनिक भवन निर्माण तथा शैक्षिक गुणस्तर वृद्धि, सबै पालिकामा १० देखि १५ शय्यासम्मका अस्पताल, पालिकाका प्रशासनिक भवन निर्माण तथा सिँचाइ, खानेपानी र विद्युतीकरणमा धेरै काम भएको उल्लेख गरेका छन् ।मदन भण्डारी लोकमार्ग र शहीद मार्ग निर्माणमा आफूले खेलेको भूमिकाबारे सबै जानकार रहेको बताएका छन् ।
उनले भनेका छन्, ‘रोल्पाको सडक सञ्जाल विस्तार गर्नका लागि मदन भण्डारी लोकमार्ग होस् वा शहीद मार्ग निर्माण र कालोपत्रे गर्ने मैले खेलेको भूमिका यहाँहरूलाई थाहा छ ।’ संघीय र स्थानीय सरकारको साझेदारीमा १० वटै पालिकाका प्रशासनिक भवनहरू संघीय र स्थानीय सरकारको साझेदारीमा करिब बनिसकेका छन् ।’
उनले ‘जनयुद्ध र जनआन्दोलन’मा योगदान गर्ने जिल्लाको जनप्रतिनिधिका रूपमा आगामी दिनमा पनि आफूले जिल्लाको इज्जत बढाउने काम गर्ने प्रतिबद्धता गरे । उनले भनेका छन्, ‘रोल्पालाई राष्ट्रिय/अन्तर्राष्ट्रिय स्तरमा चिनाउने काम गर्नेछु । राष्ट्र निर्माणमा, राष्ट्रिय स्वाधीनतामा, देशको समृद्धिमा युवाहरूलाई रोजगार/स्वरोजगार बनाउने अभियानमा लाग्नेछु ।’
