Author: Global Awaj

काठमाडौँ । पूर्वप्रधानमन्त्री शेरबहादुर देउवाले आफ्नो पक्राउ पुर्जीविरुद्ध दायर गरेको रिटमा सर्वोच्च अदालतमा सुनुवाइका लागि पेसी तोकिएको छ । न्यायाधीशद्वय महेश शर्मा पौडेल र नित्यानन्द पाण्डेयको संयुक्त इजलासमा सोमबार सुनुवाइ हुँदैछ ।

यसअघि जेठ ५ गते न्यायाधीश मेघराज पोखरेलको इजलासले लिखित जवाफ माग गर्दै कारण देखाउ आदेश जारी गरेको थियो । उक्त रिटमा आज दोस्रो सुनुवाइ हुन लागेको हो ।

देउवा विरुद्ध सम्पत्ति शुद्धीकरण अनुसन्धान विभागले काठमाडौँ जिल्ला अदालतबाट पक्राउ अनुमति लिएको छ। सर्वोच्चमा उनले उक्त मुद्दा हेर्ने क्षेत्राधिकार विशेष अदालतको भएको उल्लेख गरेका छन् ।

काठमाडौँ । सभामुख डोलप्रसाद (डीपी) अर्याल र उपराष्ट्रपति रामसहाय यादवबीच भेट भएको छ । सोमबार उपराष्ट्रपति यादवलाई भेट्न सभामुख अर्याल लैनचौरस्थित उपराष्ट्रपति निवास पुगेका थिए ।

भेटका क्रममा समसामयिक राजनीतिक विषय, संघीय लोकतान्त्रिक गणतन्त्रको सुदृढीकरण तथा संसदको प्रभावकारी सञ्चालनलगायत विषयमा छलफल भएको सभामुखको सचिवालयले जनाएको छ ।

राष्ट्रिय स्वतन्त्र पार्टी (रास्वपा) ले आफ्नो प्रथम ऐतिहासिक राष्ट्रिय महाधिवेशनको औपचारिक तयारी सुरु गर्दै विस्तृत कार्यतालिका सार्वजनिक गरेको छ। पार्टीको केन्द्रीय निर्वाचन आयोगले जेठ ६ गतेको निर्णयानुसार महाधिवेशनका लागि आवश्यक सांगठनिक र निर्वाचनसम्बन्धी कामहरूको समयसीमा तय गरेको हो।

केन्द्रीय निर्वाचन आयोगका उपप्रमुख राम गुरुङद्वारा जारी गरिएको सूचनाअनुसार महाधिवेशन तयारीका लागि ७७ वटै जिल्ला र सातै प्रदेशमा निर्वाचन समिति गठनदेखि प्रतिनिधि छनोटसम्मका कार्यहरू आगामी असार ५ गतेभित्र सम्पन्न गर्ने लक्ष्य राखिएको छ।

सार्वजनिक कार्यतालिकाअनुसार, ७७ जिल्ला र ७ प्रदेशमा निर्वाचन समिति गठन गर्न कार्य आगामी जेठ १५ गतेभित्र सक्नुपर्नेछ। यसका साथै, निर्वाचन कार्यालयले जेठ ७ गतेदेखि १० गतेभित्र सबै तहमा आधिकारिक परिपत्र तथा माइन्युटको प्रतिलिपि पठाइसक्नुपर्ने जिम्मेवारी पाएको छ।

पार्टीको तल्लो तहदेखिको प्रतिवेदन संकलनलाई पनि रास्वपाले प्राथमिकतामा राखेको छ। जेठ २० गतेभित्र स्थानीय तथा जिल्ला अधिवेशनको प्रतिवेदन संकलन गरिसक्नुपर्ने र जेठ ३० गतेभित्र जिल्ला सभापतिहरूले जिल्ला अधिवेशन तथा निर्वाचनको अन्तिम प्रतिवेदन पेश गरिसक्नुपर्ने गरी समयसीमा निर्धारण गरिएको छ।

महाधिवेशनका लागि प्रतिनिधिको नामावली संकलनका लागि पनि आयोगले मिति तोकेको छ। जिल्ला र प्रदेश समितिले जेठ २५ गतेभित्र महाधिवेशन प्रतिनिधिको अन्तिम नामावली केन्द्रमा पेश गरिसक्नुपर्नेछ। त्यस्तै, प्रदेश अधिवेशनबाट निर्वाचित भएका पदाधिकारीहरूको विवरण आगामी असार ५ गतेभित्र अनिवार्य रूपमा बुझाउनुपर्नेछ।

रास्वपाले आफ्नो महाधिवेशनमा आधुनिक प्रविधिको प्रयोगलाई पनि प्राथमिकता दिने भएको छ। कार्यतालिकाअनुसार जेठ ७ गतेदेखि असार ५ गतेसम्मको अवधिमा इलेक्ट्रोनिक भोटिङ मेसिनको प्रयोग र यससम्बन्धी प्राविधिक पक्षमा केन्द्रमा आवश्यक छलफल र तयारी गरिने उल्लेख छ।

आयोगले सबै प्रदेश समितिका सभापतिहरूलाई आ-आफ्नो प्रदेशअन्तर्गतका जिल्ला सभापतिहरूसँग आवश्यक समन्वय गरी कार्यतालिकाअनुसार कार्य सम्पादन गर्न निर्देशन दिएको छ।

काठमाडौँ । जातीय विभेदका कारण समाजमा देखा परिरहेको संरचनागत असमानता, हिंसात्मक घटनाहरू तथा ऐतिहासिक रूपमा कायम रहँदै आएको उत्पीडनप्रति आपत्ति जनाउँदै काठमाडौँको माइतीघर मण्डलामा विरोध प्रदर्शन गरिएको छ।

जात व्यवस्था उन्मूलन मोर्चा नेपाल अन्तर्गत प्रथम राष्ट्रिय सम्मेलन आयोजक समितिको समन्वयमा आयोजित उक्त प्रदर्शनमा देशका विभिन्न भागबाट आएका प्रभावित समुदायका सदस्य, अधिकारकर्मी तथा नागरिक समाजका प्रतिनिधिहरूको सहभागिता रहेको थियो।

प्रदर्शनलाई सहभागीहरूले सामाजिक न्याय, समानता र मानवअधिकारका सवालसँग जोड्दै प्रतीकात्मक प्रतिरोध दिवसका रूपमा प्रस्तुत गरेका थिए। छ वर्षअघि रुकुम जिल्लाको सोतीमा प्रेम सम्बन्धका कारण भएको भनिएको घटनामा नवराज विकसहित छ जनाको मृत्यु भएको घटनालाई स्मरण गर्दै उक्त दिनलाई प्रतिरोध र न्यायको मागसँग जोडिएको उल्लेख गरिएको थियो।

प्रदर्शनकारीहरूले जातीय विभेदका कारण अन्तरजातीय सम्बन्धमै आधारित हिंसात्मक घटनाहरू दोहोरिनु गम्भीर चुनौती भएको भन्दै राज्य संरचनाभित्र विद्यमान विभेदकारी मानसिकता अन्त्य नभएसम्म लोकतान्त्रिक अभ्यास पूर्ण नहुने धारणा राखेका छन्।

विरोधका क्रममा सहभागीहरूले भूमिहीन दलित समुदायका लागि उपयुक्त जमिनको व्यवस्था, दलित विद्यार्थीहरूका लागि छात्रवृत्ति तथा नि:शुल्क शिक्षाको सुनिश्चितता, र विगतका जातीय हिंसासम्बन्धी घटनाको छानबिन गर्न स्वतन्त्र तथा उच्चस्तरीय आयोग गठन गर्नुपर्ने माग अघि सारेका छन्।

प्रदर्शन शान्तिपूर्ण रूपमा सम्पन्न भएको आयोजक पक्षले जनाएको छ।