काठमाडौँ । नेपाल विद्यार्थी संघ (नेविसंघ) का कार्यकर्ताहरूले नेपाली काँग्रेसको केन्द्रीय कार्यालय सानेपामा धर्ना दिएका छन्। उनीहरूले पार्टीभित्र आन्तरिक एकता मजबुत बनाउन, रोकिएको १२औँ महाधिवेशनको मिति तोक्न तथा संगठनलाई पुनः सक्रिय बनाउने माग अघि सारेका हुन्।

सांकेतिक विरोधका रूपमा गरिएको धर्ना कार्यक्रममा सहभागी विद्यार्थी नेताहरूले नेपाली काँग्रेसभित्र देखिएको गुट-उपगुट अन्त्य गर्दै संगठनात्मक एकता मजबुत बनाउन नेतृत्वको ध्यानाकर्षण गराएका छन्। उनीहरूले संगठनात्मक प्रक्रियालाई समयमै अघि बढाउनुपर्ने आवश्यकता पनि औँल्याएका छन्।

धर्नाका क्रममा पार्टी कार्यालयका विभिन्न स्थानमा प्लेकार्ड टाँसिएको थियो। ती प्लेकार्डमार्फत “पार्टी एकता पहिलो प्राथमिकता”, “१२औँ महाधिवेशन सुनिश्चित गर”, तथा संगठनलाई सक्रिय बनाउनुपर्ने जस्ता सन्देशमार्फत नेतृत्वलाई दबाब दिइएको थियो।

विद्यार्थी प्रतिनिधिहरूले संगठनभित्रको आन्तरिक विभाजनभन्दा माथि उठेर समग्र पार्टी संरचनालाई एकताबद्ध बनाउनुपर्ने धारणा राखेका छन्। साथै, लामो समयदेखि रोकिएको महाधिवेशन प्रक्रिया तत्काल अघि बढाएर युवालाई नेतृत्व तहमा प्रभावकारी भूमिका दिनुपर्ने उनीहरूको माग छ।

नेविसंघका कार्यकर्ताहरूले संगठनलाई लामो समयसम्म निष्क्रिय राख्नु उचित नहुने बताउँदै नियमित महाधिवेशनमार्फत संस्थागत सुदृढीकरण अपरिहार्य भएको बताएका छन्।