काठमाडौँ । बागमती प्रदेश सरकारले सरकारी खरिद प्रक्रियासम्बन्धी सूचनाबाहेक अन्य सार्वजनिक जानकारी निजी क्षेत्रका सञ्चारमाध्यमलाई उपलब्ध गराउने नीति लिने प्रतिबद्धता जनाएको छ।
मुख्यमन्त्री इन्द्रबहादुर बानियाँले नेपाल पत्रकार महासंघको प्रतिनिधिमण्डलसँगको भेटमा यस्तो धारणा व्यक्त गरेका हुन्। उनले लोकतान्त्रिक अभ्यास अनुसार निजी क्षेत्रसँग सहकार्य आवश्यक रहेको उल्लेख गर्दै यस विषयमा संघीय नेतृत्वसँग समेत छलफल गरेको जानकारी दिएका छन्।
मुख्यमन्त्री बानियाँका अनुसार निजी सञ्चार संस्थाहरूलाई कानुनबमोजिम दर्ता भई सञ्चालन हुने अधिकार सुनिश्चित हुनुपर्ने र तिनीहरूलाई विज्ञापन वा सूचनाबाट वञ्चित गर्नु उपयुक्त नहुने बताएका छन्। उनले संघीय स्तरबाट भएका केही निर्णयले प्रदेश र निजी सञ्चार क्षेत्रबीच असमझदारी उत्पन्न हुनसक्ने संकेत पनि गरेका छन्।
यस सन्दर्भमा प्रदेश सरकारभित्र आवश्यक समन्वय गर्न मुख्य सचिवमार्फत सबै मन्त्रालय र निकायहरूलाई निर्देशन दिइएको जनाइएको छ।
उनले टेन्डरसँग सम्बन्धित सूचनाबाहेक अन्य सबै सरकारी जानकारी निजी क्षेत्रलाई उपलब्ध गराउने व्यवस्था कार्यान्वयनमा ल्याइने स्पष्ट पारेका छन्।
