काठमाडौँ । पूर्वप्रधानमन्त्री डा. बाबुराम भट्टराईले हालै सरकारी डोजर परिचालन गरिएको सुकुम्वासी बस्तीको स्थलगत अवलोकन गर्दै समस्या समाधानका नाममा अपनाइएका उपायहरूलाई व्यवस्थित पुन:स्थापनासँग जोडेर अघि बढाउनुपर्ने बताएका छन्।
बस्तीमा पुगेपछि सञ्चारकर्मीहरूसँग कुरा गर्दै भट्टराईले राज्यले गरिब तथा श्रमिक वर्गको दीर्घकालीन समाधानका लागि पहल गरिरहेको विश्वास व्यक्त गरेका छन्। उनले राम्रो उद्देश्यले गरिएका कामलाई समर्थन गर्नुपर्ने र कमजोरी देखिएमा त्यसलाई सच्याउन सुझाव दिनुपर्ने धारणा राखेका छन्।
उनका अनुसार सुकुम्वासी समस्या केवल हटाउने विषय नभई वैज्ञानिक योजना अनुसार पुन:स्थापनाको व्यवस्थासँग सम्बन्धित विषय हो। यस क्रममा वास्तविक भूमिहीन नागरिक र अनधिकृत रूपमा जग्गा कब्जा गर्ने प्रवृत्तिबीच स्पष्ट भिन्नता छुट्याउन आवश्यक रहेको उनले बताए।
भट्टराईले यसअघि गरिएका सर्वेक्षण र तथ्यांकलाई आधार मानेर व्यवस्थापन प्रक्रिया अघि बढाउनुपर्नेमा जोड दिए। उनले राज्यको भूमिकालाई दण्डात्मक नभई योजनाबद्ध र मानवीय दृष्टिकोणबाट अघि बढाउनुपर्ने सुझावसमेत दिए।
त्यसैगरी प्रधानमन्त्री वालेन्द्र शाह (बालेन) नेतृत्वको कार्यशैलीबारे टिप्पणी गर्दै उनले इन्जिनियरिङ पृष्ठभूमि भएकाले योजनाबद्ध सोचसहित नै निर्णय गरिएको हुनसक्ने विश्वास व्यक्त गरेका छन्।
