काठमाडौँ । अखिल नेपाल सुकुम्वासी संघले वैकल्पिक व्यवस्था बिना सुकुम्वासी तथा भूमिहीन बस्तीमा भइरहेको उठिबास कार्य तत्काल रोक्न माग गर्दै आन्दोलनको कार्यक्रम सार्वजनिक गरेको छ। संघले सरकार तथा सम्बन्धित निकायहरूले प्रतिबद्धता पूरा नगरे देशव्यापी आमहड्तालसम्म जाने चेतावनी दिएको हो।

बिहीबार राजधानीमा आयोजित पत्रकार सम्मेलनमार्फत संघले विभिन्न स्थानका बस्तीहरूमा राज्य संयन्त्र प्रयोग गरी डोजर चलाइँदै नागरिकलाई विस्थापित गरिएको आरोप लगाएको छ। वैकल्पिक पुन:स्थापना सुनिश्चित नगरी गरिएको यस्तो कदमले प्रभावित समुदायमा असुरक्षा र तनाव बढाएको संघको भनाइ छ।

आन्दोलनको पहिलो चरणमा भूमिहीन दलित, सुकुम्वासी तथा अव्यवस्थित बसोबासीसँग गरिएका पूर्वप्रतिबद्धता कार्यान्वयन गर्न दबाब दिने र तत्काल विस्थापन रोक्न सम्बन्धित पक्षसँग आग्रह गर्ने कार्यक्रम रहेको संघले जनाएको छ।

दोस्रो चरणअन्तर्गत मेचीदेखि महाकालीसम्म राजमार्ग अवरुद्ध गर्ने तथा सरकारप्रति असन्तुष्टि जनाउँदै देशव्यापी हस्ताक्षर अभियान सञ्चालन गर्ने योजना सार्वजनिक गरिएको छ। सो अभियानमार्फत वर्तमान नेतृत्वलाई फिर्ता बोलाउन दबाब सिर्जना गरिने संघको भनाइ छ।

संघका अध्यक्ष अमर परियारले वैकल्पिक व्यवस्थाबिना नागरिकलाई स्थानान्तरण गर्ने कार्य अस्वीकार्य भएको भन्दै आन्दोलनको बाटो रोज्न बाध्य भएको बताए। उनका अनुसार प्रारम्भिक चरणमा संवाद र आग्रहमार्फत समस्या समाधानको प्रयास गरिनेछ।

उनले माग सुनुवाइ नभएमा चरणबद्ध आन्दोलन विस्तार गर्दै सुकुम्वासी बस्ती तथा मुख्य राजमार्ग केन्द्रित संघर्षसहित देशव्यापी अनिश्चित कालीन आमहड्तालसम्म पुग्ने चेतावनी दिएका छन्।