काठमाडौँ । त्रिभुवन विश्वविद्यालयका शीर्ष तीन पदाधिकारीले एकैसाथ पदबाट अलग हुने निर्णय गर्दै सामूहिक राजीनामा दिएका छन्।

बिहीबार उपकुलपति प्रा. डा. दीपक अर्याल, शिक्षाध्यक्ष प्रा. डा. खड्ग केसी तथा रजिस्ट्रार प्रा. डा. केदारप्रसाद रिजालले आफ्नो जिम्मेवारीबाट औपचारिक रूपमा राजीनामा बुझाएका हुन्।

उनीहरूले सरकारको आग्रहअनुसार नै पदत्याग गरिएको जनाउँदै नयाँ सरकारलाई काम सञ्चालन गर्न सहज वातावरण सिर्जना गर्ने उद्देश्यले यस्तो निर्णय लिइएको बताएका छन्। पछिल्लो समय राजनीतिक नियुक्तिहरू पुनरावलोकन गर्ने तयारी भइरहेका सन्दर्भमा यो कदम आएको देखिएको छ।

अर्याल २०८२ असार २५ गते तत्कालीन प्रधानमन्त्री केपी शर्मा ओलीको सिफारिसमा उपकुलपति नियुक्त भएका थिए। त्यसैगरी, शिक्षाध्यक्ष केसी र रजिस्ट्रार रिजाल २०८० चैत ३० गते तत्कालीन प्रधानमन्त्री पुष्पकमल दाहाल ‘प्रचण्ड’को सिफारिसमा नियुक्त भएका थिए।

सामान्यतया चार वर्षे कार्यकाल रहने यी पदाधिकारीहरूले कार्यकाल पूरा नहुँदै राजीनामा दिएका हुन्।