काठमाडौँ

पुष ४ गते,

KRIP Artificial Intelligence Tech ले आयोजना गरेको हालैको पोडकास्ट कार्यक्रममा वरिष्ठ व्यवसाय सल्लाहकार डा. शम्भु पोखरेलले नेपालमा कृत्रिम बुद्धिमत्ता (AI), प्रविधि विकास, नेतृत्व र उद्यमशीलता इकोसिस्टमबारे महत्वपूर्ण धारणा व्यक्त गरेका छन्। कार्यक्रमको होस्ट सुप्रिति लामिछाने रहेकी थिइन्।

पोडकास्टमा डा. पोखरेलले नेपालमा एआई र प्रविधि क्षेत्रको दिगो विकासका लागि सरकार, विश्वविद्यालय, निजी क्षेत्र र स्टार्टअप समुदायबीच प्रभावकारी सहकार्य आवश्यक रहेको बताए। उनले नवप्रवर्तनमैत्री नीति, लगानीको पहुँच र सीपयुक्त जनशक्ति विकासबिना प्रविधि क्षेत्रमा ठोस प्रगति सम्भव नहुने स्पष्ट पारे।

उनका अनुसार विश्वविद्यालयहरू केवल शैक्षिक संस्थामा सीमित नभई अनुसन्धान, आइडिया विकास र स्टार्टअप इन्क्युबेसनका केन्द्रका रूपमा स्थापित हुनुपर्छ। उनले परम्परागत व्यवसाय मोडेललाई प्रविधि र नवप्रवर्तनमार्फत परिमार्जन गर्न सके नेपालमा समेत सिलिकन भ्यालीजस्तै उद्यमशील वातावरण निर्माण गर्न सकिने धारणा राखे।

नेतृत्वको सन्दर्भमा डा. पोखरेलले सफल नेतृत्वका लागि दीर्घकालीन दृष्टिकोण, टिममा विश्वास, मानव मूल्य र नैतिकता अत्यावश्यक हुने बताए। डिजिटल रूपान्तरण, एआई, ब्लकचेन र स्वचालन प्रविधिले भविष्यको अर्थतन्त्र र व्यवसायिक संरचनालाई निर्देशित गर्ने उनको भनाइ थियो।

होस्ट सुप्रिति लामिछानेले नेपालमा एआई र प्रविधि विकासका चुनौती तथा अवसरबारे प्रश्न उठाउँदै सरकारी समर्थन, नीतिगत स्पष्टता र नवप्रवर्तनमैत्री वातावरणको आवश्यकतामाथि जोड दिइन्। उनले युवालाई प्रविधि र उद्यमशीलतामा आकर्षित गर्न यस्ता संवाद र ज्ञान–आदानप्रदान कार्यक्रम प्रभावकारी हुने बताइन्।