काठमाडौँ 

असोज ३१ गते,

कैलाली जिल्लाको जानकी गाउँपालिका– ९ मा सामाजिक सुरक्षा भत्ता वितरणमा  भ्रष्टाचार भएको पाइएको छ। अख्तियार दुरुपयोग अनुसन्धान आयोगले जानकी गाउँपालिका– ९ का वडाध्यक्ष खकेन्द्र भण्डारीसहित आठजनाविरुद्ध विशेष अदालतमा मुद्दा दायर गरेको छ।

आयोगका अनुसार सोही वडामा मृत्यु भइसकेका व्यक्तिहरूको नाममा भत्ता वितरण गरिएको, एउटै नागरिकताको आधारमा दोहोरो लाभग्राही बनाई रकम निकासा गरिएको, नवीकरण नभएका लाभग्राहीहरूको समेत रकम निकालिएकोजस्ता अनियमितता देखिएको छ। आरोपपत्रअनुसार, कुल ६८३ जना लाभग्राहीको नाममा रकम वितरण गरिएकोमा प्रतिवादीहरूले आफैँ औँठाछाप लगाई प्रमाणितसमेत गरेका थिए। यस अनियमितताबाट रु. ७३ लाख ३७ हजार ६ सय २७ रुपैयाँ सरकारी कोषलाई हानि पुर्‍याइएको आयोगको दाबी छ।

आयोगले भ्रष्‍टाचार निवारण ऐन, २०५९ को दफा १७ अनुसार कारबाहीको माग गर्दै दोषीहरूमाथि बिगो असुलउपरको माग गरेको छ।  साथै  दफा १९ को उपदफा २ र दफा ११ बमोजिम जरिवाना सजायसमेत हुनुपर्ने मागदाबी गरिएको छ।