काठमाडौँ । सुदूरपश्चिम प्रदेशका उद्योग, पर्यटन, वन तथा वातावरण मन्त्री शिवराज भट्ट सवार गाडी मेलौली नगरपालिका क्षेत्रमा बससँग ठोक्किएको छ ।

जिल्ला प्रहरी कार्यालय बैतडीका अनुसार बिहीबार साँझ करिब ५:१५ बजे मेलौली नगरपालिका-२ सलेनामा महेन्द्रनगरबाट पञ्चेश्वरतर्फ जाँदै गरेको बस र विपरीत दिशाबाट आउँदै गरेको मन्त्री सवार गाडी एक आपसमा ठोक्किएका हुन् ।

दुर्घटनामा मन्त्री चढेको गाडीको अगाडिको भागमा सामान्य क्षति पुगेको प्रहरीले जनाएको छ । घटनामा कुनै मानवीय क्षति नभएको पनि प्रहरीको भनाइ छ ।

घटनापछि अस्थायी प्रहरी पोस्ट सलेना बाट प्रहरी टोली घटनास्थलमा पुगेको थियो । प्रहरीको समन्वयमा दुवै पक्षबीच छलफल भएपछि बस पक्षले गाडी मर्मत गरिदिने सहमति भएको जनाइएको छ ।