बिराटनगर 

पुष १८ गते,

सुनसरीको कोशी गाउँपालिका–१ मा सशस्त्र प्रहरी बल (एपीएफ) को गोली लागेर एक सिटी सफारी चालकको मृत्यु भएको घटनाले देशभर ध्यान तानेको छ। तस्करी नियन्त्रणका लागि खटिएको सशस्त्र प्रहरीको गोली प्रहारबाट स्थानीय ४५ वर्षीय विजय साहको घटनास्थलमै मृत्यु भएपछि स्थिति तनावपूर्ण बनेको हो।

घटना बिहीबार राति करिब सवा १ बजे कोशी गाउँपालिका–१ अन्तर्गत पुरी टोलमा भएको सुनसरी प्रहरीका डीएसपी चन्द्रबहादुर खड्काले जानकारी दिए। मृतक साह सोही वडाका स्थायी बासिन्दा तथा पेशाले सिटी सफारी चालक हुन्।

प्रारम्भिक विवरणअनुसार विजय साहले आफ्नै सिटी सफारीमा ८–१० बोरा चिनी लोड गरी भारतबाट नेपालतर्फ ल्याउँदै गरेका थिए। सीमा क्षेत्रमा नियमित गस्तीमा रहेको सशस्त्र प्रहरीको टोलीले उनलाई रोकेर जाँच गर्न खोज्दा दुवै पक्षबीच विवाद उत्पन्न भएको बताइएको छ। मालसामान ओसारपसारको विषयलाई लिएर सुरु भएको विवाद केही समयमै चर्किएपछि सशस्त्र प्रहरीले गोली चलाएको र गोली लागेर साहको घटनास्थलमै मृत्यु भएको स्थानीयको दाबी छ।

घटनापछि आक्रोशित स्थानीयवासीले शव उठाउन नदिई प्रदर्शन गरिरहेका छन्। सशस्त्र प्रहरीले प्रयोग गरेको बल र गोली प्रहारको कारणबारे निष्पक्ष छानबिनको माग गर्दै उनीहरूले विरोध जनाएका हुन्। घटनास्थलमा ठूलो संख्यामा प्रहरी परिचालन गरिएको छ भने अवस्था अझै तनावपूर्ण रहेको प्रहरीको भनाइ छ।

डीएसपी खड्काका अनुसार मृतकको शव पोष्टमार्टमका लागि उठाउन पहल भइरहेको छ र घटनाको यथार्थ छानबिन गर्न आवश्यक कानुनी प्रक्रिया अघि बढाइनेछ। सशस्त्र प्रहरी बलको तर्फबाट पनि घटनाबारे आन्तरिक अनुसन्धान सुरु गरिएको जनाइएको छ।

सीमावर्ती क्षेत्रमा तस्करी नियन्त्रणका नाममा भएको यस घटनाले सुरक्षा निकायको कार्यशैली, बल प्रयोगको मापदण्ड र नागरिक सुरक्षाबारे गम्भीर प्रश्न उठाएको छ। घटनाको निष्पक्ष छानबिन र दोषीमाथि कडा कारबाहीको मागसहित यो विषय आज देशकै मुख्य समाचार बनेको छ।