काठमाडौँ 

पुष १५ गते,

काठमाडौँ महानगरपालिकाका मेयर बालेन्द्र साह (बालेन) ले देश निर्माणको कुरा सबैले गर्ने भए पनि त्यसका लागि वास्तविक रूपमा अघि बढ्ने पात्र नै निर्णायक हुने बताएका छन्। सामाजिक सञ्जालमार्फत सार्वजनिक स्टाटसमा उनले बाबु सुधन गुरुङले निर्वाह गरेको भूमिकाको खुलेर प्रशंसा गर्दै उक्त योगदान देशले सय वर्षसम्म पनि नबिर्सने उल्लेख गरेका छन्। मेयर बालेनको यो अभिव्यक्ति पछिल्लो पुस्तामा लोकप्रिय मानिएका रवि लामिछाने, कुलमान घिसिङ र बालेन एकै स्थानमा जोडिएको पृष्ठभूमिमा आएको हो। जेन जेड पुस्ताका नेता सुधन गुरुङले यी तीनै व्यक्तित्वलाई एक ठाउँमा ल्याउन महत्वपूर्ण भूमिका निर्वाह गरेको उल्लेख गरिएको छ।

पुराना राजनीतिक दलहरूको शासकीय अव्यवस्थाविरुद्ध आ–आफ्नो क्षेत्रमा एक्लै आवाज उठाएर उदाएका तीन नयाँ राजनीतिक शक्तिबीच पार्टी एकता भएसँगै बालेनको यो स्टाटस सार्वजनिक भएको हो। रवि लामिछाने नेतृत्वको राष्ट्रिय स्वतन्त्र पार्टीसँग काठमाडौँका मेयर बालेन्द्र साह (बालेन) समूहबीच एकता भएको भोलिपल्ट कुलमान घिसिङ संलग्न रहेको उज्यालो नेपाल पार्टी पनि एकता प्रक्रियामा जोडिएको छ।

रास्वपा र उज्यालो नेपाल पार्टीबीचको एकतासँगै पुराना राजनीतिक शक्तिविरुद्ध उठेको आवाज अब करिब एक ठाउँमा संगठित हुँदै गएको देखिएको छ। विवेकशील साझा पार्टी यसअघि नै रास्वपामा समाहित भइसकेको छ भने जेन जेड आन्दोलनका केही अगुवाहरू पनि रास्वपामा प्रवेश गरिसकेका छन्। जेन जेड आन्दोलनका युवाहरूले राजनीतिक, नैतिक र भौतिक समर्थनलाई तीनवटा संगठित समूहमा केन्द्रित गर्दै आगामी चुनावका लागि यी शक्तिहरू एकसाथ आउनुपर्ने दबाब निरन्तर दिँदै आएका थिए।

पुराना पार्टीहरूको बर्चस्व तोड्न छुट्टाछुट्टै चुनावमा भाग लिँदा अपेक्षित परिणाम नआउने निष्कर्षसहित यी तीन राजनीतिक शक्तिहरू एक ठाउँमा आएको विश्लेषण गरिएको छ।