काठमाडौँ, ३ भदौः राष्ट्रिय समाचार समिति (रासस) र भारतको प्रतिष्ठित समाचार एजेन्सी (एएनआई)बीच सहकार्यसम्बन्धी सम्झौता पुनरावलोकन गरी अद्यावधिक गर्ने विषयमा छलफल भएको छ । रासस केन्द्रीय कार्यालयमा आज रासस र एएनआईबीच समाचार आदानप्रदानलगायतका विषयमा छलफल भएको हो ।

त्यस अवसरमा राससका कार्यकारी अध्यक्ष धर्मेन्द्र झाले राससले पछिल्ला दिनमा गरेका संस्थागत सुधार र विकासका प्रयासबारे जानकारी गराउनुभयो । उहाँले राससको पुस्तकालयलाई पत्रकार, पत्रकारिता अध्ययन गर्ने विद्यार्थी र अनुसन्धानकर्ताका लागि गन्तव्य बनाउने उद्देश्यले स्तरोन्नतिको काम अगाडि बढाइएको बताउनुभयो ।