काठमाडौँ । वैदेशिक रोजगार क्षेत्रमा हुने ठगी नियन्त्रणका लागि डिजिटल प्रणाली विस्तार गरिएको श्रम, रोजगार तथा सामाजिक सुरक्षा मन्त्रालयले जनाएको छ ।

प्रतिनिधि सभा अन्तर्गतको उद्योग तथा वाणिज्य र श्रम तथा उपभोक्ता हित समितिको बैठकमा मन्त्री रामजी यादवले मन्त्रालयले ठगीसम्बन्धी उजुरी व्यवस्थापनलाई डिजिटलाइजेसनमार्फत व्यवस्थित गर्न काम सुरु गरेको जानकारी दिएका हुन् ।

उनका अनुसार हालसम्म वैदेशिक रोजगार विभागमा दर्ता भएका करिब ४० हजार मुद्दामध्ये १३ हजार मुद्दा डिजिटल प्रणालीमा रूपान्तरण गर्ने तयारी गरिएको छ, जसमा आठ हजार मुद्दा पहिले नै डिजिटलाइज भइसकेका छन् । बाँकी मुद्दा कारबाही प्रक्रियामा रहेको उनले बताए ।

मन्त्री यादवले अनुसन्धान तथा छानबिन कार्यलाई प्रभावकारी बनाउन मन्त्रालयले १० जना अनुसन्धान अधिकृतको मागसमेत गरेको जानकारी दिए ।

उनका अनुसार विमानस्थलमार्फत विदेश जाने तथा फर्किने यात्रुहरूबाट वैदेशिक रोजगारसम्बन्धी ४३४ जनासँग विस्तृत प्रश्नावलीमार्फत तथ्य संकलन गरिएको छ । सो अध्ययनमा सहभागीमध्ये करिब ३८ प्रतिशतले व्यक्तिगत श्रम स्वीकृति लिएर वैदेशिक रोजगारीमा गएको पाइएको उनले बताए ।