काठमाडौँ । नेपाल प्रहरीले सुकुम्वासी तथा भूमिहीनको नाममा केही व्यक्तिहरूले गलत लाभ लिने प्रयास गरेको देखिएको भन्दै त्यसप्रति सचेत रहन आग्रह गरेको छ। साथै सरकारले अघि बढाएको सुकुम्वासी व्यवस्थापन कार्यमा सबै पक्षले सहयोग गर्नुपर्नेमा जोड दिएको छ।

प्रहरीले शुक्रबार सामाजिक सञ्जाल फेसबुकमार्फत सार्वजनिक गरेको सन्देशमा उक्त व्यवस्थापन कार्यक्रम वास्तविक भूमिहीन तथा आवासविहीन नागरिकको सुरक्षित बसोबास, सम्मानजनक जीवन र अधिकार सुनिश्चित गर्ने उद्देश्यले सञ्चालन गरिएको स्पष्ट गरिएको छ। वास्तविक लाभग्राहीको पहिचान गरी आवश्यक आवास तथा सेवा-सुविधा उपलब्ध गराउने लक्ष्य यस प्रक्रियाको रहेको उल्लेख गरिएको छ।

त्यस्तै, केही स्वार्थ प्रेरित व्यक्तिहरूले सुकुमवासीको नाम र अधिकारको दुरुपयोग गर्दै फाइदा उठाउने प्रयास भइरहेको पाइएको प्रहरीको भनाइ छ। यस्ता गतिविधिबारे सम्बन्धित समुदाय स्वयं जानकार रहेको पनि सन्देशमा उल्लेख छ।

यस्ता गलत अभ्यासका कारण वास्तविक सुकुम्वासी तथा भूमिहीनहरू राज्यका सेवा-सुविधाबाट वञ्चित हुनुपर्ने अवस्था सिर्जना भएको दाबी गर्दै प्रहरीले समस्या लामो समयदेखि निरन्तर रहँदै आएको जनाएको छ।

प्रहरीले वास्तविक भूमिहीनहरूको पहिचानमा सहयोग गर्न र नक्कली दाबी गर्ने व्यक्तिहरूलाई पहिचान गरी व्यवस्थापन प्रक्रियालाई सफल बनाउन सबैलाई सहकार्य गर्न आह्वान गरेको छ।