काठमाडौँ । नेकपा (एमाले) का अध्यक्ष केपी शर्मा ओलीले नेपाली कम्युनिष्ट पार्टी (नेकपा)का अध्यक्ष पुष्पकमल दाहाल ‘प्रचण्ड’ र नेता नारायणकाजी श्रेष्ठसँग पार्टी एकताको विषयमा कुनै छलफल नभएको स्पष्ट पारेका छन् ।

हालै स्वास्थ्य उपचारका क्रममा अस्पतालमा भेट भए पनि त्यस भेटमा राजनीतिक एकता सम्बन्धी कुनै पनि प्रकारको कुराकानी नभएको उनको प्रस्टोक्ति रहेको छ ।

एमाले नेता विशाल भट्टराईका अनुसार अध्यक्ष ओलीसँग भेटपछि गरिएको जानकारी सामाजिक सञ्जालमार्फत सार्वजनिक गरिएको हो । भट्टराईले हालै शल्यक्रिया गरिएका ओलीको स्वास्थ्य अवस्था क्रमशः सुधार हुँदै गएको र उनी चाँडै नै सक्रिय राजनीतिक भूमिकामा फर्किने तयारीमा रहेको उल्लेख गरेका छन् ।

उनका अनुसार अस्पतालबाट डिस्चार्ज भएको भोलिपल्ट निवासमा पुग्दा पनि ओलीको स्वास्थ्य अवस्था सन्तोषजनक देखिएको थियो । उमेर र स्वास्थ्य चुनौतीका बाबजुद पनि उनी उत्साही र सक्रिय देखिएको अनुभव उनले साझा गरेका छन् ।

भट्टराईले ओलीको पित्तथैलीमा २४ मिलिमिटरको पत्थरी देखिएपछि शल्यक्रिया गरिएको तथा सोही क्रममा हर्नियाको पनि उपचार गरिएको जानकारी दिएका छन् । आईसीयूमा रहँदा पनि सामान्य अवस्थामा देखिएको र डिस्चार्जपछि निवासमै हिँडडुल गरिरहेको देख्दा आफूलाई सकारात्मक अनुभूति भएको उनको भनाइ छ ।