काठमाडौँ । नेकपा एमालेले आगामी स्थानीय तह तथा प्रदेश सभा निर्वाचनको तयारीलाई तीव्र बनाउन मातहतका संरचनाहरूलाई मतदाता नामावली संकलन तथा अद्यावधिक प्रक्रियामा सक्रिय हुन आग्रह गरेको छ।

पार्टीद्वारा जारी निर्देशन अनुसार, निर्वाचनसँग सम्बन्धित कार्यतालिकालाई ध्यानमा राख्दै स्थानीय तह र वडा तहसम्मका समितिहरूलाई मतदाता विवरण संकलनमा समन्वयकारी भूमिका निर्वाह गर्न भनिएको छ।

यस क्रममा सम्बन्धित निर्वाचन कार्यालयसँग सहकार्य गर्दै आवश्यक प्रक्रिया पूरा गर्न पनि जोड दिइएको छ।

निर्वाचन आयोगले चैत २२ गतेदेखि मतदाता नामावली दर्ता तथा अद्यावधिक प्रक्रिया पुनः सञ्चालनमा ल्याएको सन्दर्भलाई मध्यनजर गर्दै पार्टीले आफ्नो संगठनात्मक संरचनालाई परिचालन गरेको हो।