काठमाडौँ 

फागुन १५ गते,

गृहमन्त्री तथा सरकारका प्रवक्ता ओमप्रकाश अर्यालले आगामी फागुन २१ गते निर्धारण गरिएको प्रतिनिधि सभा सदस्य निर्वाचन पारदर्शी, निष्पक्ष र त्रासरहित वातावरणमा सम्पन्न गरिने बताएका छन्।

दोलखा जिल्लाको बैतेश्वर गाउँपालिका अन्तर्गत रहेका मतदान स्थलहरूको स्थलगत अनुगमनका क्रममा उनले विगत निर्वाचनमा देखिएका कमजोरीको समीक्षा गर्दै यसपटक कुनै पनि प्रकारको अनियमितता नहोस् भन्ने सुनिश्चित गर्न सुरक्षा तथा प्रशासनिक संयन्त्रलाई आवश्यक निर्देशन दिएका हुन्। निर्वाचन प्रक्रिया व्यवस्थित, शान्त र विश्वसनीय बनाउन सबै सरोकारवाला निकाय सक्रिय रूपमा जुट्नुपर्नेमा उनले जोड दिए।

गृहमन्त्री अर्यालले सामाजिक सञ्जालमार्फत फैलिन सक्ने भ्रामक सूचना र दुष्प्रचारप्रति सतर्क रहन सम्बन्धित निकाय तथा स्थानीय तहका प्रतिनिधिलाई आग्रह गरे। उनले निर्वाचन तयारीका प्रत्येक चरणमा संयमता, समन्वय र कानुनी मापदण्डको पालना अनिवार्य रहेको उल्लेख गरे।

शुक्रबार बिहान गरिएको निरीक्षण तथा अन्तरक्रियामा कार्यवाहक प्रमुख निर्वाचन आयुक्त रामप्रसाद भण्डारी समेत सहभागी थिए। टोलीले मतदान केन्द्रको पूर्वाधार, सुरक्षा प्रबन्ध तथा आवश्यक व्यवस्थापनको अवस्थाबारे जानकारी लिएको थियो।

अनुगमनमा सशस्त्र प्रहरी बलका महानिरीक्षक राजु अर्याल, नेपाली सेनाका बलाधिकृत रथी प्रदिपजंग केसी, प्रहरी अतिरिक्त महानिरीक्षक गणेश ठाडा मगर, गृह मन्त्रालयका प्रवक्ता आनन्द काफ्ले, सह-प्रवक्ता रमा आचार्य, प्रहरी नायब महानिरीक्षक विष्णु भट्ट, प्रमुख निर्वाचन अधिकृत रामप्रसाद न्यौपाने, दोलखाका प्रमुख जिल्ला अधिकारी हरिप्रसाद घिमिरे, गाउँपालिका अध्यक्ष छवि लामा तथा वडा सदस्य सोम्बर बहादुर तामाङ लगायतको उपस्थिति रहेको थियो।