काठमाडौँ 

मंसिर २३ गते,

बलात्कारको आरोप लागेको जनमत पार्टीका निलम्बित केन्द्रीय सचिव बीपी साहलाई अनुसन्धानका लागि पाँच दिन हिरासतमा राख्न अदालतले अनुमति दिएको छ ।

जिल्ला अदालत धनुषाले उनलाई हिरासतमा राखेर अनुसन्धान गर्न पाँच दिनको समय दिएको धनुषाका एसपी रुगमबहादुर  कुँवरले जानकारी दिए । मंगलबार साह आफैं जिल्ला प्रहरी कार्यालय धनुषामा उपस्थित भएका थिए ।  

जनकपुरधामकी २७ वर्षीया एक महिलाले साहले आफूलाई जबर्जस्ती करणी गरेको आरोप लगाउँदै जिल्ला प्रहरी कार्यालय धनुषामा उजुरी दिएकी थिइन् । जाहेरी दर्ता भएपछि प्रहरी प्रशासनले साहविरुद्ध पक्राउ पुर्जी जारी गरेको थियो । 

सामाजिक सञ्जालमा सक्रिय देखिएका उनी आफैं प्रहरी कार्यालय पुगेका हुन् । उनलाई पक्राउ गर्न प्रहरी पनि नजिकै पुगेको थियो । पक्राउ पर्ने डरले उनी आफैँ आएको एसपी कुँवरले बताए ।  

साहमाथी जाहेरी दर्ता भएपछि जनमत पार्टीले केन्द्रीय सचिवबाट निलम्बन गरेको थियो ।