इजरायली प्रधानमन्त्री बेञ्जामिन नेतान्याहुले हमासद्वारा बन्दी बनाइएका नेपाली विद्यार्थी विपिन जोशीकी आमा पद्मा र बहिनी पुष्पासँग मंगलबार पौने एक घण्टा भेट गरेका छन्। 

जेरुसेलमस्थित प्रधानमन्त्री कार्यालयमा बन्धक मामिलासम्बन्धी सल्लाहकार गार्ल हार्थलगायतको टोलीसँग प्रधानमन्त्री नेतान्याहुले मंगलबार दिउँसो भेट गरेका हुन्। 

विपिनको रिहाईका लागि आफ्नो सरकारले कुनै कसर बाँकी नराखेको बताउँदै प्रधानमन्त्री नेतान्याहुले नेपालको सबै मुलुकसँगको सुमधुर सम्बन्धको उपयोग गर्दै विपिनको रिहाईका लागि प्रयास गर्न सुझाव पनि दिएका छन्। 

केही अरब मुलुकको हमाससँग सम्बन्ध रहेको र ती मुलुकसँग नेपालको सुमधुर सम्बन्धको स्मरण गराउँदै नेतान्याहुले यस्तो सुझाव दिएका हुन्। 

पद्मा र पुष्पालाई नेतान्याहुको ‘नमस्ते’
प्रधानमन्त्री नेतान्याहुलाई भेट गर्न इजरायलका लागि नेपाली राजदूत प्रा धनप्रसाद पण्डितका साथ विपिनकी आमा पद्मा र बहिनी पुष्पा प्रधानमन्त्री कार्यालय पुगेका थिए। 

उनीहरू त्यहाँ पुग्दा इजरायका लागि जापानी राजदूत कोइची ओविसी पनि प्रधानमन्त्री नेतान्याहुसँग भेटघाटका लागि प्रतिक्षारत थिए।
तर, प्रधानमन्त्री नेतान्याहुले विपिनकी आमा र बहिनीसँगको भेटघाटलाई प्राथमिकता दिएर जापानी राजदूतभन्दा पहिले भेटघाट गरेको राजदूत पण्डितले बताए। 

पण्डितका अनुसार पद्मा, पुष्पा प्रतीक्षारत रहेको राखिएको भेटघाट कक्षमा प्रधानमन्त्री नेतान्याहु ‘नमस्ते’ भन्दै प्रवेश गरेका थिए। कक्षमा प्रवेश गरेपछि नेतान्याहुले तीनै जनासँग हात मिलाए।

नेतान्याहुसँगको भेटका क्रममा पद्मा छोरा विपिनको तस्बिरसहित पुगेकी थिइन्। पद्माको हातमा विपिनको तस्वीर देखेपछि नेतान्याहुले त्यो तस्वीर आफूलाई दिन नेतान्याहुले आग्रह गरे, पुष्पाले दिइन्। 

विपिनको तस्वीर हातमा लिएपछि नेतान्याहुले त्यसलाई गहिरोसँग नियाले। ‘विपिन नभएको भए त्यसदिन हमासबाट त्यहाँ थप ८-१० जनाको ज्यान जान सक्थ्यो, तर विपिनले उनीहरूको ज्यान जोगाए’ विपिनको तस्बिर देखाउँदै नेतान्याहुले भने, ‘त्यसैले, विपिनसाहसी र वास्तविक हिरो हुन्।’ 

विपिनलाई उनले इजरायलीहरूले ‘रोल मोडल’ का रुपमा चित्रित गरेको समेत बताएका थिए। नेतान्याहुले विपिनको सुरक्षित रिहाईका लागि सरकार लागिरहेकोमा आश्वस्त गराए।

‘हमासले बन्धक बनाएका सबैजना इजरायलका लागि समान छन्,’ उनले भने, ‘बन्धकहरूलाई रिहा गर्ने सवालमा हामीले स्वदेशी-विदेशी भनेर भेदभाव गरेका छैनौँ।’

‘उहाँले दाजुको रिहाइका आफूहरूको तर्फबाट सक्दो प्रयास गरिरहेको बताउनु भएको छ’ प्रधानमन्त्री नेतान्याहुसँगको भेटघाट सकिनासाथ नेपालखबरसँगको कुराकानीमा बहिनी पुष्पाले भनिन्, ‘दाजुको रिहाइको प्रयासका लागि भ्रमणको प्रबन्ध गरिएकोमा हामी आभारी छौँ।’ 

नेतान्याहुले हमासको कब्जामा अझै ५० जना बन्धक रहेको उल्लेख गर्दै त्यसमध्ये मृत्यु भइसकेका बन्धकहरूबारे जानकारी रहेको बताएका थिए।

‘तर विपिनबारे त्यस्तो अन्यथा कुनै जानकारी प्राप्त भएको छैन’ उनको भनाइ थियो। 

नेतान्याहुले पुष्पासँग साटासाट गरे पीडा
नेतान्याहुसँगको भेटमा आमा पद्माले जसरी हुन्छ, आफ्नो छोरा विपिनलाई चाँडोभन्दा चाँडो मुक्त हुने वातावरण बनाइदिन नेतान्याहुसँग आग्रह गरेकी थिइन्। 

‘विपिनको कसैसँग शत्रुता थिएन, पढ्नका लागि भर्खर इजरायल आएको विद्यार्थीसँग शत्रुता हुने कुरा पनि थिएन,’ पद्माले भनेकी थिइन्, ‘कसैसँग शत्रुता नभएकाले विपिनलाई मुक्त हुने वातावरण बनाइदिनुहुनेछ भन्नेमा विश्वस्त छौँ।’

बहिनी पुष्पाले विपिन अपहरित भएपछि आफूहरू लामो समय केही पनि सोच्न सक्ने स्थितिमा नरहेको नेतान्याहुलाई जानकारी गराएकी थिइन्। 

‘दाजुको अपहरणको घटना भएपछि हामी लामो समय केही सोच्नसक्ने अवस्थामा थिएनौँ’ पुष्पाको भनाइ थियो, ‘त्यहीकारण बल्ल २२ महिनापछि साहस गरेर हामीहरू यहाँसम्म आइपुगेका छौँ।’

दाजु विपिन अपहरित हुँदा आफूले भोग्नु परेको पीडा पुष्पाले सुनाएपछि नेतान्याहुले पनि आफ्नो पीडाको पृष्ठभूमि पनि पुष्पाको जस्तै रहेको सुनाएका थिए।

उनका दाजु जोनाथन नेतान्याहु प्यालेस्टिनी अतिवादीहरूले युगाण्डाको एन्टेवे विमानस्थलबाट कब्जामा लिएका इजरायली बन्धकहरूलाई छुटाउन इजरायलले सन् १९७५ मा सञ्चालन गरेको विशेष अपरेसनका क्रममा मारिएका थिए।

‘आफ्नो दाजुभाई मारिँदा वा वेपत्ता हुँदाको पीडा कस्तो हुन्छ, त्यो मलाई थाहा छ’ प्रधानमन्त्री नेतान्याहुले पुष्पासँग भने, ‘यस हिसाबले तपाइँका दाजु विपिन बेपत्ता हुँदा कस्तो पीडा भइरहेको छ, म सहजै बुझ्न सक्छु।’ 

राजदूत पण्डितका भनाइमा, नेतान्याहुले विपिनको रिहाइका लागि इजरायल र नेपालमात्र होइन, अन्य मुलुकहरूको समेत साथ आवश्यक रहेको उल्लेख गरेका छन्। सबैसँग सुमधुर सम्बन्ध रहेको नेपालले यसका लागि संयुक्त राष्ट्रसंघको मञ्च प्रयोग गर्न सक्ने सुझाव दिएका छन्।