काठमाडौँ । प्रहरीले १० जना बिचौलियाहरूलाई पक्राउ गरेको छ । पूर्व जाने गाडीमा सिट मिलाइदिने भन्दै यात्रु तानातान गरेर हैरानी दिएको आरोपमा उपत्यका ट्राफिक प्रहरी कार्यालय रामशाहपथबाट खटिएको टोलीले उनीहरूलाई काठमाडौँको कोटेश्वरबाट पक्राउ गरेको हो । 

पक्राउ पर्नेमा धनुषा घर भएका ४० वर्षीय सूर्यबहादुर देवकोटा, दोलखा घर भएका ३२ वर्षीय प्रकाश सिवाकोटी, २६ वर्षीय खड्कबहादुर तामाङ, भक्तपुरका ५५ वर्षीय हरिभजन थापा, ३८ वर्षीय डिल्लीप्रसाद लामिछाने, सिन्धुपाल्चोकका २८ वर्षीय सुरेश तामाङ, सिन्धुलीका २७ वर्षीय तिलक कुमार थापा, डोरकुमार श्रेष्ठ, ओखलढुङ्गाका ४५ वर्षीय नन्दलाल बुढाथोकी र सिन्धुपाल्चोकका ३६ वर्षीय राजेश सापकोटा छन् ।

प्रहरीका अनुसार कोटेश्वरबाट जनकपुर र महोत्तरी लगायतका स्थानमा जाने ईभी माइक्रो र सुमोमा उनीहरूले कमिसन लिएर यात्रु चढाउने र यात्रुलाई हैरानी दिने गरेको आरोप छ । उनीहरूलाई थप अनुसन्धान र कारबाहीका लागी जिल्ला प्रहरी परिसर काठमाडौँमा पठाइएको प्रहरीले जनाएको छ।