काठमाडौँ । राष्ट्रिय स्वतन्त्र पार्टीकी सांसद शोभा खनालले कृषि उत्पादनको महत्वपूर्ण समयमा किसानले रासायनिक मल नपाउने अवस्था अन्त्य गर्न सरकारको ध्यानाकर्षण गराएकी छन् ।

बुधबार बसेको प्रतिनिधि सभा बैठकमा बोल्दै सांसद खनालले मलको सहज उपलब्धता सुनिश्चित गर्न र किसानको समस्यालाई प्राथमिकतामा राखेर काम गर्न सरकारसँग माग गरेकी हुन् ।

उनले मल अभावका कारण उत्पादन घट्ने, किसानको खर्च बढ्ने र समग्र खाद्य सुरक्षामा समेत असर पर्ने अवस्था आउन सक्ने भन्दै सम्बन्धित निकायलाई तत्काल आपूर्ति व्यवस्थापन गर्न आग्रह गरिन् ।

सांसद खनालले गोरखासहित देशभरका किसानका लागि आवश्यक मात्रामा रासायनिक मल उपलब्ध गराउनुपर्ने बताइन् । खेतीपातीको मुख्य समयमा किसानहरू मल खोज्न बाध्य भए पनि समस्या समाधानमा अपेक्षित पहल नभएको उनको भनाइ थियो ।

उनले मल वितरण प्रणालीलाई थप व्यवस्थित, प्रभावकारी र पारदर्शी बनाउन पनि सरकारको ध्यानाकर्षण गराइन् ।