काठमाडौँ । नेपाल कम्युनिष्ट पार्टी (नेकपा) का नेता अग्नि सापकोटाले आगामी २०८४ सालको स्थानीय तह निर्वाचनलाई केन्द्रमा राखेर सक्रिय रूपमा काम गर्न जनप्रतिनिधिलाई निर्देशन दिएका छन्।

काठमाडौँको कमलादीस्थित नेपाल प्रज्ञा-प्रतिष्ठानमा जारी जनप्रतिनिधि प्रशिक्षण कार्यक्रममा सम्बोधन गर्दै उनले पार्टीको पक्षमा सकारात्मक प्रभाव पार्ने गरी जनस्तरमा सक्रिय हुनुपर्ने बताएका हुन्।

उनले प्रशिक्षणपछि सहभागीहरू नयाँ आत्मविश्वास र संकल्पसहित आ-आफ्नो क्षेत्रमा फर्किने उल्लेख गर्दै आगामी निर्वाचनको परिणाममा पार्टीको पहलकदमी निर्णायक बन्न सक्ने धारणा राखे। देशको संरक्षण र राजनीतिक दिशानिर्देशनका लागि पनि सक्रिय राजनीतिक भूमिका आवश्यक रहेको उनको भनाइ थियो।

कार्यक्रममा उनले भेलामा उठेका धारणा तथा सुझाव शीर्ष नेतृत्वले सुनिरहेको जानकारी पनि दिए। उनका अनुसार पार्टीका संयोजक पुष्पकमल दाहाल सहित शीर्ष नेताहरूले सहभागीका भनाइ सुनेपछि कार्यक्रम समापनका क्रममा निर्देशनात्मक सम्बोधन गर्ने तयारी गरिएको छ।