काठमाडौँ । नेपाली काँग्रेसका सांसद अर्जुननरसिंह केसीले भदौ २३ र २४ गते भएका घटनासम्बन्धी छानबिन प्रतिवेदन सार्वजनिक गर्न सरकारसँग माग गरेका छन्।

प्रतिनिधि सभाको बैठकमा धारणा राख्दै उनले घटनाको अध्ययनका लागि राष्ट्रिय मानवअधिकार आयोग अन्तर्गत गठन गरिएको समितिले तयार पारेको प्रतिवेदन हालसम्म सार्वजनिक नगरिनुको कारणबारे प्रश्न उठाए।

सांसद केसीले लिली थापाको संयोजकत्वमा तयार पारिएको प्रतिवेदन कुन स्वार्थका कारण रोकिएको हो भन्ने विषयमा संसद्ले जानकारी पाउनुपर्ने बताएका छन्।

उनले उक्त घटनाका क्रममा लामो समयसम्म सर्वसाधारणले असुरक्षित र राज्यको संरक्षणविहीन अवस्था अनुभूत गर्नुपरेको उल्लेख गर्दै यस्ता घटना पुनः नदोहोरिने सुनिश्चितता सरकारले दिनुपर्ने धारणा राखेका छन्।

त्यस्तै, घटनाको अनुसन्धानका लागि गठन गरिएको गौरीबहादुर कार्की नेतृत्वको जाँचबुझ आयोगको प्रतिवेदनसमेत औपचारिक रूपमा सार्वजनिक नभएको भन्दै उनले सरकारको ध्यानाकर्षण गराएका छन्।

केसीले दुवै प्रतिवेदन यथाशीघ्र सार्वजनिक गरी घटनामा संलग्नमाथि कानुनअनुसार कडा कारबाही प्रक्रिया अघि बढाउन माग गरेका छन्।