काठमाडौँ । जिल्ला अदालत काठमाडौँले विभिन्न गम्भीर आपराधिक आरोपमा पक्राउ परेका प्रकाश पाठकलाई पुर्पक्षका लागि थुनामा पठाउन आदेश दिएको छ।

न्यायाधीश सुदर्शन लामिछानेको इजलासले आरोपको प्रकृति, उपलब्ध प्रमाण तथा घटनाको संवेदनशीलतालाई आधार मान्दै अनुसन्धान अवधिभर थुनामा राख्नुपर्ने निष्कर्षसहित आदेश जारी गरेको हो। पाठकमाथि आपराधिक षड्यन्त्र, आपराधिक लाभ, हुण्डी कारोबार तथा विद्युतीय कारोबारसम्बन्धी कसुरमा अनुसन्धान भइरहेको जनाइएको छ।

प्रहरीले उनलाई फिलिपिन्सबाट पक्राउ गरी नेपाल ल्याएको थियो। उक्त प्रक्रिया इन्टरपोल र जिल्ला प्रहरी परिसर काठमाडौँबीचको समन्वयमा सम्पन्न भएको बताइएको छ। यस प्रकरणमा नेपाल नागरिक उड्डयन प्राधिकरणका निलम्बित महानिर्देशक प्रदीप अधिकारीविरुद्ध पनि मुद्दा दर्ता गरिएको प्रहरीले जनाएको छ।

अनुसन्धानका क्रममा पाठकले अख्तियार दुरुपयोग अनुसन्धान आयोगका प्रमुख आयुक्त प्रेमकुमार राईसहित उच्च तहका १० जना पदाधिकारीलाई धम्की दिएको आरोप सार्वजनिक भएको थियो।