काठमाडौँ । बिहानबाट देशभर एकै साथ कक्षा १२ को परीक्षा सुरु भएको छ । परीक्षा चलिरहँदा जाजरकोटका दुई परीक्षा केन्द्रबाट ४० थान मोबाइल बरामद गरिएको छ ।

सोमबारदेखि सुरु भएको परीक्षाका क्रममा जिल्लाको शिवालय गाउँपालिका–७ स्थित वीरेन्द्र माध्यमिक विद्यालय परीक्षा केन्द्र र शिवालय गाउँपालिका–३ स्थित सरस्वती माध्यमिक विद्यालय सीमा परीक्षा केन्द्रबाट परीक्षार्थीहरूले ल्याएको मोबाइल बरामद गरिएको हो ।

परीक्षालाई मर्यादित, व्यवस्थित र निष्पक्ष बनाउन गरिएको सुरक्षा जाँचका क्रममा परीक्षार्थीहरूले साथमा ३५ थान ल्याएको मोबाइल नियन्त्रणमा लिइएको हो । उक्त परीक्षा केन्द्रमा २४१ जना परीक्षार्थीमध्ये २१६ जना सहभागी भएका छन् भने २५ जना अनुपस्थित रहेका छन् ।

त्यसैगरी, सरस्वती माध्यमिक विद्यालय सीमा परीक्षा केन्द्रका केन्द्राध्यक्ष कमल थापाका अनुसार उक्त केन्द्रबाट ५ थान मोबाइल बरामद गरिएको छ । २१२ जना परीक्षार्थीमध्ये १७९ जना मात्र परीक्षामा सहभागी भएका छन् भने ३३ जना अनुपस्थित रहेका छन् ।

यस वर्ष परीक्षामा नियमिततर्फ तीन लाख ३२ हजार १७८ विद्यार्थीले परीक्षा दिँदै छन् । जसमध्ये एक लाख ७२ हजार १२ छात्र, एक लाख ६० हजार १३७ छात्रा र अन्य २९ परीक्षार्थी सहभागी हुँदै छन् । आंशिकतर्फ ८५ हजार ८३० परीक्षार्थीहरू गरी चार लाख १८ हजार आठ विद्यार्थी सहभागी हुँदै छन् ।