काठमाडौँ । शान्तिपूर्ण प्रदर्शनका क्रममा पक्राउ परेका विद्यार्थी नेताहरूलाई तत्काल बिना सर्त रिहा गर्न नेपाल विद्यार्थी संघ (नेविसंघ) ले माग गरेको छ।

गृहमन्त्री सुधन गुरुङको राजीनामा माग गर्दै गरिएको प्रदर्शनका क्रममा पक्राउ परेकाहरूमाथि गरिएको कारबाहीप्रति आपत्ति जनाउँदै नेविसंघले यस्तो माग अघि सारेको हो।

नेविसंघका कार्यवाहक सभापति नवीन पौडेल ले जारी गरेको विज्ञप्तिमा लोकतान्त्रिक अभ्यासअन्तर्गत शान्तिपूर्ण विरोधलाई अवरोध गर्न नहुने उल्लेख गरिएको छ। संगठनले पक्राउ परेका विद्यार्थी नेताहरूलाई अविलम्ब रिहा गर्न आग्रह गरेको छ।

रिहा नगरे थप आन्दोलनका कार्यक्रम अघि बढाइने चेतावनीसमेत नेविसंघले दिएको छ।

यसैबीच, गृहमन्त्रीको राजीनामा माग गर्दै गरिएको प्रदर्शनका क्रममा विभिन्न विद्यार्थी नेताहरू पक्राउ परेका थिए। पक्राउ पर्नेहरूमा केन्द्रीय सदस्य भुवन भट्ट सहित कुम्मरोज देउवा, नवीन विष्ट, आकाश देवकोटा, सुशील ऐडी र विशाल बिसी रहेका छन्।