काठमाडौँ 

फागुन २६ गते,

अघिल्लो प्रतिनिधिसभा निर्वाचनमा सत्ता गठबन्धनका साझा उम्मेदवारलाई हराउँदै मकवानपुर–१ बाट विजयी भएका राष्ट्रिय प्रजातन्त्र पार्टी (राप्रपा)का नेता दीपकबहादुर सिंह यसपटक भने जमानतसमेत जोगाउन असफल भएका छन् । बिहीबार सम्पन्न प्रतिनिधिसभा सदस्य निर्वाचनमा सिंहले चार हजार पाँच सय ७४ मत मात्रै प्राप्त गरेका छन् । कुल सदर मतको १० प्रतिशतभन्दा कम मत पाएपछि उनको जमानत जफत भएको हो ।

यसपटक मकवापनुर क्षेत्र नम्बर १ मा राष्ट्रिय स्वतन्त्र पार्टीका प्रकाश गौतम विजयी भएका छन् भने नेपाली कांग्रेसकी महालक्ष्मी उपाध्याय डिना १४ हजार मतसहित दोस्रो भएकी छन् । यसअघि २०७९ सालको प्रतिनिधिसभा निर्वाचनमा सिंहले सत्ता गठबन्धनको साझा उम्मेदवार बनेकी कांग्रेसकी डिनालाई नै पराजित गर्दै पहिलोपटक संसद् यात्रा तय गरेका थिए । उनले २७ हजार ८१६ मत प्राप्त गर्दा डिनाले २५ हजार ४३४ मत पाएकी थिइन् । सिंहले डिनालाई २ हजार ३८२ मतान्तरले हराएका थिए ।

तर, यसपटकको निर्वाचनमा मत परिणाम नाटकीय रूपमा फेरिएको छ । प्रत्यक्षतर्फ कुल ९५ हजार ३१० मत खसेको मकवानपुर १ मा ४ हजार ८०१ मत बदर हुँदा ९० हजार ५०९ मत सदर भएको थियो । निर्वाचन कानुनअनुसार जमानत जोगाउन उम्मेदवारले कम्तीमा सदर मतको १० प्रतिशत मत ल्याउनुपर्ने हुन्छ । सो आधारमा यस क्षेत्रमा जमानत जोगाउन उम्मेदवारलाई ९ हजार ५० मत आवश्यक थियो । तर सिंहले पाँच हजार मत पनि कटाउन सकेनन् । उनले जम्मा ४ हजार ५७४ मत मात्रै ल्याए ।