‘निफ’मा ११ नेपाली फिल्म

नेपाल चलचित्र तथा सांस्कृतिक प्रतिष्ठानले वर्षेनी आयोजना गर्दै आइरहेको ‘नेपाल अन्तर्राष्ट्रिय चलचित्र महोत्सव(निफ)’को चौथो संस्करणमा यो वर्ष लामा र छोटा गरी ११ वटा नेपाली फिल्म प्रदर्शन हुने भएका छन् ।

आयोजकका अनुसार यो वर्ष प्रकाश झा निर्देशित ‘होमः एन ओडी टु अल फादर्स’, तील थापा मगर निर्देशित ‘प्रिष्ट’, दीपक सुब्बा निर्देशित ‘सोल्ड इन इराक’, राजन कठेत निर्देशित ‘बेर ट्रिज इन द मिस्ट’, अमृत कौछा निर्देशित ‘धर्सो’, गणेश रावल निर्देशित ‘संशय’ प्रदर्शन हुँदैछन् ।

यस्तै राजेश श्रेष्ठ निर्देशित ‘द वार आफ्टर वार’, राजेशप्रसाद खत्री निर्देशित ‘स्केरक्रो’ र कृषा चौलागाईं निर्देशित ‘ऐना’, गणेश पाण्डे निर्देशित ‘सिभिल सोल्जर्स’ र सर्जियो बासो निर्देशित ‘टेल मी हु आइ एम’ छन् ।

फेस्टिभल तथा संस्थाका अध्यक्ष केपी पाठकले यो वर्षको लागि ५२ देशबाट ४ सय ५० बढी फिल्मले आवेदन दिए पनि ६ सदस्यीय जुरीले ३१ देशका ६३ फिल्मलाई फेस्टिभलका लागि छनोट गरेको बताए ।

केपीका अनुसार फेस्टिभलमा ‘फिचर फिल्म कम्पीटिसन(इन्टरनेसनल’, ‘लाइभ एक्सन सर्ट फिल्मस्(इन्टरनेसनल)’, ‘एनिमेटेड सर्ट फिल्मस्(इन्टरनेसनल्स)’, ‘डकुमेन्ट्री कम्पीटिसन’, फिचर फिल्म कम्पीटिसन(नेसनल) र ‘सर्ट फिल्म कम्पीटिसन(नेसनल)’ विधामा प्रतिष्पर्धा हुनेछ ।

फेस्टिभलमा ‘बेस्ट फिचर फिल्म(इन्टरनेसनल)’ विधामा उत्कृष्ट हुने फिल्मले १५ सय डलर राशीको ‘गौतम बुद्ध अवार्ड’ पाउनेछ । आयोजकले यो वर्ष ‘पेन्डामिक फिल्म एक्जिभिट’ नामक विधा पनि थप गरेको छ । जसमा कोभिड महामारीको समयमा निर्माण भएका वृत्तचित्र प्रदर्शन गरिनेछ । यो विधाको विजेताले ५ सय डलर पुरस्कार पाउनेछ । फेस्टिभल आगामी मे ६ देखि मे १० सम्म काठमाडौंमा हुनेछ ।

Like Share on Social media
  •  
  •  
  •  
  •  

स्वतन्त्रतामा नेपाल दक्षिण एसियामा तेस्रो