काठमाडौँ । कानून, न्याय तथा संसदीय मामिलामन्त्री सोविता गौतमले जेन जेड आन्दोलनका शहीद तथा घाइतेहरूको माग सम्बोधन गर्न सरकार प्रतिबद्ध रहेको बताएकी छन् ।

जेन जेड शहीद दिवसका अवसरमा जेन जेड शहीद कल्याणकारी समाजले आयोजना गरेको कार्यक्रममा उनले वर्तमान सरकारप्रति भरोसा राख्न आग्रह गरेकी हुन् । उनले जेन जेड आन्दोलनका माग सम्बोधन दैनिक छलफल भइरहेको बताइन् ।

लोकतन्त्रमा पनि गत भदौ २३ गते नागरिकमाथि गोली चलेको उल्लेख गर्दै अब त्यस्तो नियति कसैले भोग्न नपर्ने बताइन्।

उनले शहीद परिवार, घाइते तथा आन्दोलनसँग जोडिएका सबैलाई एक ठाउँमा आएर एक अर्कालाई सहयोग गर्न र ढाडस दिन पनि आग्रह गरिन्। जेन जेड भित्रै विभाजन र दोषारोपण बढेमा आन्दोलनका विरोधीहरूले त्यसको फाइदा उठाउने उनको भनाई छ । आन्दोलनपछि भएको निर्वाचनमार्फत नेपाली जनताले आफ्नो नेतृत्व रोजेकोले वर्तमान सरकार जनताको आवाज सुन्न तयार रहेको बताइन्।

सरकार गठन भएको करिव पाँच महिना मात्र भएको बताउँदै उनले यस अवधिमा सरकार सञ्चालन सहज नभएको उल्लेख गरिन् । सरकारसँग प्रतिनिधिसभामा पर्याप्त संख्या भए पनि कानून निर्माण लगायतका प्रक्रियामा संवैधानिक संरचनाका कारण चुनौती रहेको उनको भनाई छ । उनले माग सम्बोधनमा ढिलाइ हुँदा जेन जेड समुदायको धैर्य टुट्ने अवस्था आउन सक्ने स्वीकार गर्दै संयम कायम राख्न आग्रह गरे । सरकारले जेन जेड आन्दोलनका शहीद तथा घाइतेले देखेका सपना पूरा गर्न सरकारको सफा नियतका साथ काम गरिरहेको उनको भनाई छ ।