काठमाडौँ । नेपाल आयल निगमले आगामी दसैँ-तिहारका समयमा पेट्रोलियम पदार्थको आपूर्ति प्रभावित नहुने जनाएको छ। निगमका अनुसार पेट्रोल, डिजेल, मट्टितेल र हवाई इन्धनको मौज्दात चाडपर्वको माग धान्न पर्याप्त रहेको छ।

उद्योग तथा वाणिज्य र श्रम तथा उपभोक्ता हित समितिको बुधबार बसेको बैठकमा निगमका कार्यकारी निर्देशक नागेन्द्र साहले हाल औसत १३ देखि १४ दिनको इन्धन भण्डारण कायम रहेको जानकारी दिए। उनका अनुसार निगमसँग १ करोड ५० लाख लिटर पेट्रोल, ४ करोड ६० लाख लिटर डिजेल, १७ लाख लिटर मट्टितेल र ७० लाख लिटर हवाई इन्धन मौज्दात छ।

पेट्रोलको दैनिक खपत करिब २० लाख लिटर रहेको उल्लेख गर्दै साहले दसैँ-तिहारमा माग केही बढे पनि उपलब्ध मौज्दातबाट आपूर्ति व्यवस्थापन गर्न सकिने बताए।

निगमका अनुसार अहिले सबैभन्दा बढी दबाब खाना पकाउने एलपीजी ग्यासको आपूर्ति व्यवस्थापनमा देखिएको छ। नेपालमा विभिन्न ५८ वटा ब्रान्डका सिलिन्डर कारोबारमा रहेकाले आपूर्ति प्रणाली व्यवस्थापनमा जटिलता उत्पन्न भएको साहले बताए।

उनका अनुसार भारतमा सीमित ब्रान्डबाट एलपीजी कारोबार हुने गरेको भए पनि नेपालमा धेरै ब्रान्ड र फरक–फरक सिलिन्डरको प्रयोगले दीर्घकालीन रूपमा आपूर्ति व्यवस्थापन कठिन बनाएको छ। यसलाई समाधान गर्न ब्रान्ड मर्जरको विकल्पमा निगमले अध्ययन तथा योजना अघि बढाएको उनले बताए।

नेपालले भारतका विभिन्न रिफाइनरी तथा डिपोबाट एलपीजी आयात गर्नुपर्ने र ढुवानी दूरी लामो रहेकाले आपूर्ति व्यवस्थापनमा समय र लागत दुवै बढ्ने निगमको भनाइ छ। भारतबाट करिब १ हजार २२५ सिलिन्डर बोकेको एउटा बुलेट नेपाल आइपुग्न करिब १० दिन लाग्ने साहले बताए।