काठमाडौँ । नेपाली काँग्रेसले पार्टी सदस्यबाट संकलित सदस्यता शुल्कको एक अंशबाट ‘मानव सहायता कल्याण कोष’ स्थापना गरेको छ।

बीपी कोइरालाको स्मृति दिवसका अवसरमा बुधबार आयोजित ‘ग्रिन रन’ कार्यक्रममा पार्टीका सभापति गगन थापाले कोष सञ्चालनमा ल्याइएको जानकारी दिएका हुन्।

थापाका अनुसार कोषमा प्रारम्भिक रूपमा १० लाख रुपैयाँ जम्मा गरिएको छ। उक्त रकम विस्थापित सुकुम्वासी परिवारलाई सहयोग गर्न प्रयोग गरिनेछ। विशेष गरी एकल महिला तथा विद्यालय जान नपाएका बालबालिकालाई प्राथमिकतामा राखेर सहायता उपलब्ध गराइने उनले बताए।

उनले पार्टी सदस्यहरूले बुझाएको सदस्यता शुल्कको केही हिस्सा सामाजिक उत्तरदायित्वका कार्यक्रममार्फत परिचालन गर्ने उद्देश्यले कोष स्थापना गरिएको उल्लेख गरे।

कोषमार्फत गरिने सहयोगको व्यवस्थापनमा नेपाल महिला संघका स्वयंसेवक परिचालन गरिने थापाले जानकारी दिए। उनीहरू प्रभावित बस्तीमा पुगेर आवश्यकताको पहिचान गर्ने तथा सहयोग वितरणको कार्यमा संलग्न हुनेछन्। साथै, तरुण दलसहित इच्छुक अन्य स्वयंसेवकलाई पनि अभियानमा सहभागी हुन उनले आह्वान गरे।