काठमाडौँ । नेपाली कांग्रेसका सभापति गगनकुमार थापाले पासपोर्ट ठेक्का प्रकरणलाई लिएर वर्तमान सरकारले अख्तियार दुरुपयोग अनुसन्धान आयोगलाई तर्साएर निष्क्रिय बनाउने प्रयास गरेको आरोप लगाएका छन्। उनले अख्तियारलाई राजनीतिक प्रभावबाट मुक्त, स्वतन्त्र र प्रभावकारी संवैधानिक निकायका रूपमा स्थापित गर्न नियुक्ति प्रक्रियामै सुधार आवश्यक रहेको बताएका छन्।

पोखरामा आयोजित एक कार्यक्रममा बोल्दै थापाले विगतका सरकारले आफ्ना निकट व्यक्तिलाई नियुक्त गरेर अख्तियारलाई कमजोर बनाएको र अहिलेको सरकारले दबाब सिर्जना गरेर त्यसलाई पंगु बनाउने प्रयास गरिरहेको दाबी गरे।

‘दलको आदेश मान्ने वा राजनीतिक दबाबमा चल्ने अख्तियार दुवै अवस्थामा प्रभावकारी हुन सक्दैन। पछिल्लो समय पासपोर्ट ठेक्का प्रकरणमा तपाईंहरूले सुनिरहनुभएको छ। अघिल्ला सरकारले आफ्ना मान्छे नियुक्त गरेर अख्तियारलाई पंगु बनायो भने अहिलेको सरकारले तर्साएर पंगु बनाउने काम गरिरहेको छ। हामीले त स्वतन्त्र संवैधानिक निकाय खोजेका हौँ,’ उनले भने।