काठमाडौँ । ‘नेपाली ब्रो’ भनेर चिनिने कुमार थापामगरले श्रीमती ईश्वरी भुजेलको हत्या गरेको स्वीकार गर्दै कानुनबमोजिमको सजाय भोग्न तयार रहेको बयान दिएका छन्। उनले अनुसन्धानका क्रममा दिएको बयानमा आफूले धारिलो चक्कुले श्रीमतीको घाँटी रेटेर हत्या गरेको स्वीकार गरेका हुन्।

बयानअनुसार नेपाली सेनामा कार्यरत रहँदा ईश्वरी भुजेलसँग चिनजान भई प्रेम विवाह भएको थियो। केही वर्षपछि सेनाको जागिर छाडेर वैदेशिक रोजगारीमा गएका उनी नेपाल फर्किएपछि सामाजिक सञ्जाल टिकटकमार्फत ‘नेपाली ब्रो’का रूपमा चर्चित बनेको र त्यसक्रममा विभिन्न व्यक्तिसँग चिनजान बढेको बताएका छन्।

उनले टिकटकमार्फत प्रतिक्षा आचार्यसँग चिनजान भई पछि प्रेम सम्बन्धमा परिणत भएको तथा उनीहरूबीच पटक–पटक भेटघाट र शारीरिक सम्बन्धसमेत भएको बयान दिएका छन्। यही सम्बन्धका कारण श्रीमतीसँग मनमुटाव बढ्दै गएको र त्यसपछि वैवाहिक करणी तथा सम्बन्ध विच्छेदसम्बन्धी मुद्दा अदालतमा पुगेको उनको दाबी छ।

बयानमा उनले आफूले पटक–पटक मिलापत्रको प्रयास गरेको उल्लेख गरेका छन्। घटनाको दिन वैवाहिक करणी र सम्बन्ध विच्छेदसम्बन्धी मुद्दाको पेशी रहे पनि श्रीमती अदालतमा उपस्थित नभएको र त्यसपछि घरमा काम गर्ने युवती तथा छोरासँग भएको विवादका कारण आफू थप तनावमा परेको उनले बताएका छन्।