काठमाडौँ । राष्ट्रिय स्वतन्त्र पार्टी (रास्वपा) को महाधिवेशनबाट निर्वाचित केन्द्रीय समितिमा महिलाको प्रतिनिधित्व ५१ प्रतिशत पुगेको छ। राष्ट्रिय मान्यता प्राप्त राजनीतिक दलहरूमध्ये निर्वाचित केन्द्रीय समितिमा आधाभन्दा बढी महिला प्रतिनिधित्व भएको यो पहिलो अवस्था भएको पार्टीले जनाएको छ।

पार्टी विधानले केन्द्रीय समितिमा न्यूनतम ३३ प्रतिशत महिला प्रतिनिधित्व सुनिश्चित गरेको भए पनि महाधिवेशनको निर्वाचन परिणामले त्यसभन्दा बढी सहभागिता देखाएको छ। निर्वाचनबाट चयन भएका ९९ केन्द्रीय सदस्यमध्ये ५० जना महिला निर्वाचित भएका छन्। उनीहरूमध्ये २६ जना प्रदेशतर्फ र २४ जना राष्ट्रियतर्फबाट केन्द्रीय समितिमा पुगेका हुन्। विधानअनुसार निर्वाचित सदस्यमध्ये कम्तीमा ३३ महिला भए पर्याप्त हुने व्यवस्था रहे पनि निर्वाचन परिणामले उक्त न्यूनतम सीमा पार गरेको छ।

प्रदेशगत रूपमा हेर्दा बागमतीबाट निर्वाचित हुने सबै पाँच केन्द्रीय सदस्य महिला रहेका छन्। त्यस्तै, कोशी, मधेस, लुम्बिनी र कर्णालीबाट चार–चार जना तथा गण्डकी र सुदूरपश्चिमबाट तीन–तीन जना महिलाले निर्वाचन जितेका छन्।