काठमाडौँ । नेकपा (एमाले)का अध्यक्ष केपी शर्मा ओलीले आफ्नो नेतृत्व र पार्टीले गरेका कामका कारण जनतामा असन्तुष्टि सिर्जना भएको भन्ने दाबी तथ्यमा आधारित नभएको बताएका छन्।

जननेता मदन भण्डारीको ७५औँ जन्मजयन्तीका अवसरमा आयोजित कार्यक्रममा सम्बोधन गर्दै उनले एमालेविरुद्ध विभिन्न आरोप र नकारात्मक भाष्य निर्माण गरिएको टिप्पणी गरे। जनमतलाई प्रभावित पार्ने उद्देश्यले भ्रमपूर्ण प्रचार गरिएको उनको भनाइ थियो।

ओलीले आफ्नो पार्टीका कामकारबाहीमा केही कमजोरी र सीमितता रहेको स्वीकार गर्दै आवश्यक परे आत्मसमीक्षा गर्न तयार रहेको बताए। तर, त्यसका आधारमा देशलाई पछाडि धकेलेको वा राष्ट्रिय हित विपरीत काम गरेको भन्ने निष्कर्ष स्वीकार्य नहुने उनको धारणा थियो।

उनले एमाले नेतृत्वले विकास निर्माणका विभिन्न आयोजना अघि बढाएको दाबी गर्दै मुलुकलाई अगाडि बढाउने दिशामा काम गरिएको उल्लेख गरे।